Facsimile view
ACOC027.007
![]()
dezir / segun las Reglas delos geometricos / pero basta al presente aver
dicho esto & aun non quiero callar otra cosa / la qual es esta / &l Regno de
castilla tañe tres climas del mundo / & jnglaterra es fuera de todos
los siete climas / ca aun que aquella parte de jnglaterra que esta fazia
françia / por ventura tañe la postrimera parte del clima seteno / pero
la mayor parte de jnglaterra es fuera delos siete climas / pues co
mo quiere la provinçia que los astronomos non posieron dentro delos
climas / e que se puede dezir terçera parte del Regno de castilla / ser
preferida / a Regno que tanta muchedunbre de provinçias tiene &
tanto numero de climas tañe / quanto es alo segundo dela fermosa
diferençia delas gentes / &l Regno de castilla sobrepuja a jngla
terra manifiesta mente / ca / so el señorio demi señor el Rey hay di
versas nasçiones & diversos lenguajes & diversas maneras de
guarniçiones de guerra / asi por mar / como por tierra / ca los castellanos
& los gallegos & los vizcaynos diversas nasçiones son & usan de
diversos lenguajes del todo / & para guerra de mar / tiene mi señor
el Rey naves & galeas / & para guerra de tierra tiene omnes de armas
guarnidos de nobles cavallos & muy fuertes armaduras & tiene
eso mesmo cavalleros ginetes / los quales usan de armas moriscas
& persiguen los enemigos con maravillosa ligereza & corren la tierra
dellos & desque han destruydo & talado Retornanse ala batalla
delos omes de armas / &n jnglaterra non son tantas nasçiones
nin hay tamaña / nin tan fermosa diferençia de pueblos / & el
señor Rey de jnglaterra aun que tiene naves non tiene galeas
para guerra de mar / & aun que tiene cavalleros & omes de armas
armados de armaduras comunes para guerra de tierra / non tiene
ginetes / & asi mayor poderio & mas fermosa diferençia es de gen
tes & de tierras / so mi señor el Rey de Castilla / que so el señor Rey de
jnglaterra / delo qual se sigue que es mas honorable su prinçipado
& mas alta la dignidad de su corona / & por consiguiente le es devido
mayor honor / callo agora la fermosura & grandeza de su corte
/ ca fablando con paz & Reverençia de todos los prinçipes / yo podria
dezir que dentro desta parte del mundo que sabemos / non hay corte
de algun prinçipe que syn algun bulliçio & movimiento de guerra
sea tan visitada & llena de tantos prelados & condes & barones &
Text view •
Pageflow view •
wordcloud •
Manuscript line view
