non ençendio su mal querençia conel fauor dela fortuna Antes la Amato con mucha bondad njn judgo dignos de muerte & de destierro Aquellos de qujen tenja sanna & henojo. Alos vnos fueron tyradas las Armas otros las pusyeron por su voluntad desagradesçido & ynjusto es todo çibdadano que ljbrado del peljgro delas Armas avn tyenen el coraçon Armado & mejor que este judgo yo Aquel/ que Cayo en la vatalla & perdyo su Arma enla Contyenda Calo que avnos se puede Judgar porfia eso mjsmo A otros puede tener por firmeza mas ya toda la discordja es quebrantada porlas Armas & Amatada por la ygualdad del vençedor & sola mente finca que todos quieran vna cosa non sola mente. los que han avn sentymjento & sabjduria mas avn Alos que syenten Algo de sanjdad & çesar sy tu non fueres saluo & non durares enesta sentençja dela qual Antes & Agora mayor mente vsaste nos non podremos ser saluos por ende todos Aquellos que cobdiçiamos que estas cosas sobre dichas sean saluas te Requerimos & te Rogamos que pongas buen Recabdo en tu vida & por que tu Cujdas que Ay Alguna Cosa de que te deves guardar fablando por los otros Aquello que ya syento de mj mesmo todos te prometemos non solamente de te dar guardas & velas. mas de poner delante ti en todo peljgro nuestros Cuerpos mas por que en Aquello que Començe se fenesca mj Razon muy grandes graçias te damos çesar & avn mayores tenemos que te dar Ca todos syenten Aquella mesma cosa que tu podiste sentyr por los Ruegos & lagrjmas de todos & por quanto non fue nesçesarjo Atodos los presentes que fablasen quesyeron que yo lo dixese & entiendo bien que todo Aquello que hera Nesçesario & onesto de se fazer por el otorgamjento de marco marçelo Ala orden del senado & Al pueblo Romano & ala cosa publjca todo se faze Ca veo que todos han