menço la fabla asi. Çesar los que delante ty osan fablar non saben la tu grandeza. los que delante ty non osan fablar non conosçen la tu bondat. ¶ lo qual por çierto puedo yo con tan grand razon dezir avos como el açesar dizia ca çesar muy grande fue non gelo podemos negar & mucho monto enel mundo mas omne llano de çibdat nasçio vno del pueblo romano & nueua & reziente fue su grandeza & ganada por vna desegual osadia. ca fermosa mente dize del tulio que non ouo otro derecho aregnar sy non quelo ymagino & sallio se conello. ¶ Otra es por çierto la lindeza dela corona de españa que desçiende texida de enperadores & reyes desde los siglos antiguos Nin ouo çesar tal benignidat que non leamos del muchas cosas crueles fechas por fartar su terrible ambiçion las quales son agenas de vuestra muy humana bondat que para vos seruir a todos anima. Por ende avn que vuestra grandeza me ponga temor vuestra virtud me da osadia. & avn que reconosçiendo vuestra exçelençia la lengua quisiera çesar recordandose dela vuestra suauidat muy benigna. la mano corrio conla peñola esperando con presto coraçon & alegre resçebir vuestra jemienda notable. ¶ Ca mas dul