¶ El dia de oy padres conscritos/ puse fin al luengo silençio/ que yo estos tienpos guardaua/ no por temor alguno/ mas parte por enojo/ & parte por verguença/ este mesmo dia me dio comjenço/ para dezir todas las cosas que qujsiese & sintiese/ segund mj primera costunbre/ ca tanta mansedunbre/ tanta piedat no vsada nj oyda/ tanta tenprança/ en tan gran poderio de todas las cosas sabiduria & virtud tan yncreyble/ & poco menos diujnal no las puedo por alguna manera pasar callando rrestituyendo a vos otros padres conscritos/ & ala cosa publica marco marçelo/ no sola mente la boz del mas la mja & mj actoridat/ eso mesmo/ cuydo que vos fue guardada & rrestituyda/. ca mucho me pesaua padres conscritos/ & fuerte mente me atormentaua/ quando veya vn tal varon/ que avia seydo en aquella rrazon e causa que yo / & non ser enese mesma fortuna. / nj yo me podia amonestar / nj tenja por cosa convinjente & sofridera / que yo andoujese enel vuestro antiguo ayuntamjento/ veyendo apartado de mj como de conpannero/ aquel que sienpre se trabajo/ de ser semejable de mjs estudios/ & de mjs trabajos/. pues asi es Jullio çesar/ que oy me abriste la costunbre de mj vida